BIOGRAFIE



BEP

Bep (Henny Schmitz-Ridderbeks) oftewaal
Henny van Piërre vanne Boereleenbank.
Henny ziene pap deej vreuger auch al buutte make en optraeje.
Later deeje ze same op Bontje Aovende ’n buutte.
Henny waerde zelfs door de Veldjmuus oet Remunj ins gevraog veur
de Bontje Aovend in de Oranjerie en ut haet ins mitgedaon
aan de veurronjes van de buuttekampioensjappe.
Mer ut toneelsjpele haw vanaaf 1987 toch de veurkeur.
Gezellig mit eine groep 't ganse jaor door ein toneelsjtuk make is gans get angers es gans alléin ’n buutte make in de vastelaovestied.
In al die jaore waas ut waal altied te ‘vange’ om tiedens feesjes ’n
veurdrachtje te doon of om ‘urges’ aan mit te doon.

BEP EN BOB

Wie in 2007 ut Grenslandfees in Postert (nao jaore) weer ins waerde
gevierd zeen Wim en Henny same es "sjutter" en es
"ex-grenslandkeuningin" dao haer gegange.
Gezellig es tiepetje get tusje de miense doorloupe en hiej
en dao ein praotje make….. Genaote hawwe ze allebei!
En zo is ut duo Bep en Bob ontsjtange.
De eerste keer presenteerde ze zich op de Posterse Bontje Aovend mit ’n korte buutte en ’n sketch. Zie vonje ut allebei geweldig sjoon om te doon en hawwe de sjmaak te pakke.
Noe waerde ut evvel serieus want ze wolle hiej ech waal gaer mit doorgaon mer dan moosj ut waal te gooj waere aangepak!
Nou, det is vriej good geluk:
Idder feesje waerd opins ’n sjtuk gezelliger es Bep en Bob d’r zeen…!
Bie “Tiepetjes” en “Diversen” kint geer zeen wat ze zoal doon!

BOB

Bob (Wim Janssen) is es gebaore in Haelen en wie d’r ‘n jaor of 7 waas is d’r mit zien eljers nao Remunj verhoes.
Oppe legere school woor d’r altied te vinje veur ’t opveure van toneelstukskes en wie d’r ‘n jaor of 12 waas begoosj d’r mit buutte-optraejes.
Mit zien zus sjooide d’r broelofte en feeste aaf om
op te traeje. Nao aaflaop moogde d’r mit de muts rondjgaon
om get cente op te haole.
Toen bleef ‘t ein paar jaor get rustiger mit zien optraejes.
Hae leerde ’n Posters maedje kinne en nao ’n paar jaor is d’r
mit um getrouwd en in Postert gaon wone.
Auch toen bleef ‘t get rustig om ‘m haer. (huisje, boompje,
beestje, kinjer.)
Op zeker daag vroog zien euverbuurvrouw (Henny) tusje naas
en lippe door, of d’r veur de toneeloetveuring es aap wol fungere.
Eers dach d’r det ‘t ’n grapje woor mer det waas toch ech
serieus bedoeld en zo is d’r lid van de toneelvereniging gewaore. Die krege mit Wim eine gooie sjpeler d'r biej mit eine geweldige mimiek.